Құрметті ата-аналар!

Көктемнің шуағымен бірге балаларымыздың белсенділігі де арта түседі. Алайда дәл осы кезеңде олардың өміріне төнетін қауіп-қатерлер де еселенетіні сөзсіз. Осы орайда Балалардың құқықтарын қорғау комитеті ата-аналарға, мұғалімдерге және барша ересектерге балалардың күнделікті өміріне мұқият қарауға шақырады. Балаларымыздың өмірі – біздің қолымызда! Әрбір ата-ана сақтық шараларын ұстанып, қауіпсіздік ережелеріне бейжай қарамауы тиіс.

Ресми деректерге сәйкес, 2024 жылы Қазақстанда балалардың терезеден құлау көрсеткіші өткен жылмен салыстырғанда екі есеге артты. Әсіресе, 2-5 жас аралығындағы бүлдіршіндер үшін бұл аса қауіпті. Мұндай қайғылы жағдайлар көбіне ересектердің бейқамдығынан және терезеге арнайы қорғаныс құралдарының орнатылмауынан орын алады.

Сондай-ақ, суға кету оқиғалары да алаңдатарлық деңгейге жетті. 2024 жылы елімізде балалардың су айдындарында қаза табуы өткен жылмен салыстырғанда 1,5 есе өскен. Бұл әсіресе 10-16 жас аралығындағы балалар мен жасөспірімдер арасында жиі кездеседі. Мұның басты себептері – қараусыз шомылу және арнайы рұқсат етілмеген, жабдықталмаған су айдындарында суға түсу.

Қайғылы оқиғалардың алдын алу үшін мына қарапайым, бірақ аса маңызды ережелерді есте сақтаңыз:

Бірінші. Терезелерге сақтық құрылғыларын орнатыңыз – арнайы құлыптар, торлар мен бекіткіштер балалардың құлауына жол бермейді.

Екінші. Тек қауіпсіз жерлерде суға түсіңіз – құтқару қызметі бар жағажайларды таңдаңыз, бейтаныс су айдындарынан аулақ болыңыз.

Үшінші. Балаларыңызды қараусыз қалдырмаңыз – әсіресе су маңында әрдайым бақылауда ұстаңыз.

Төртінші. Судағы қауіп-қатерлерді түсіндіріңіз – биіктен суға секіру, тереңдікте ойнау және қатты ағыстарға жақындау өте қауіпті екенін үйретіңіз.

Бесінші. Балаларды алғашқы көмек көрсетуге баулыңыз – суға кеткен адамға қалай көмек көрсету керектігін білудің өзі біреудің өмірін сақтап қалуы мүмкін

Құрметті ата-аналар!

Балаларымыздың амандығы – біздің ең үлкен жауапкершілігіміз. Біз олардың қауіпсіздігін қамтамасыз етуге міндеттіміз. Қайғылы жағдайлардың алдын алу – өз қолымызда!

ҚР Оқу-ағарту министрлігі

Балалардың құқықтарын қорғау комитетінің

төрағасы Насымжан Оспанова

08.04.2025 жылы Екібастұз қаласы, «Зерде» мамандандырылған мектеп-лицейінде Санжар Керімбайдың “Қаныш және ғылыми майдан” кітабы бойынша өткізілген әдеби-ғылыми сайыстың шешуші кезеңі “Самғау” шығармашылық орталығында өтті.
Ақтық сайысқа 50 оқушының арасынан үздік деп танылған 10 оқушы жолдама алып, білімдерін сынады.
«Қаныш және ғылыми майдан» кітап оқу сайысында «Қаныш ізбасары» номинациясын иеленген оқырмандар:
Тұрмағамбет Дамира, Төлебек Елдос, Жумаканова Айым, Хуатжан Дина, Сейіт Шыңғыс, Мусабеков Береке, Мұхтар Аяла .

«Қаныш және ғылыми майдан» кітап оқу сайысында жүлделі ІІІ орын иеленген - Еркін Дариға (40.000 теңгелік сыйақыны ұтып алды); жүлделі ІІ орын иеленген - Қадырхан Нұрлан (60.000 теңгелік сыйақыны ұтып алды); жүлдері І Орынды иеленген - Амантай Інжу (100.000 теңгелік сыйақыны ұтып алды)!

Сайыс жеңімпаздарын марапаттауға демеушілік жасаған меценат Мереке Байжан, облыстық маслихат депутаты, ЖШС «Гидропром» директоры Культуманов Исламбек Махмеровичке және шараны ұйымдастыруға демеушік еткен ЖШС «Иртыш Интер фуд» директоры Амренов Сакен Құдайбергенович пен жеке кәсіпкер Қали Диас Қалиұлы Үлкен алғыс айтамыз!

Барлық қатысушыларға алғысымызды білдіре отыра шығармашылық шабыт пен толағай табыс тілегіміз келеді!